政情：茅台博士貪湯厚顏赴兩會
「貪湯」前廉政專員湯顯明嘅貪腐醜態仲喺立法會嘅專責委員會審緊，佢前日仲被踢爆喺二○○八年，分別收取由內地最高人民檢察院同香港賽馬會送上嘅多張北京奧運門票連酒店住宿，以及多張香港奧運馬術賽門票，涉嫌有利益衝突，難為舊年撈咗個全國政協銜頭嘅佢，尋日就大搖大擺搭飛機去北京出席兩會會議，完全唔知個醜字點寫。佢搭飛機時，個篋掛咗一個寫住「湯顯明博士」嘅名牌，佢係乜嘢博士？唔使問都係茅台博士啦。
法學學位點得嚟？
貪湯尋日仲好意思同其餘十多名港區人大同政協一齊搭飛機上京開兩會，我哋喺機場見到貪湯一落車就急急步咁行入貴賓室，而佢嗰個軍綠色嘅行李篋就掛住個類似卡片嘅行李牌，寫住「湯顯明博士」同佢嘅多個聯絡方法。究竟佢係乜嘢博士呢？可能係貪腐博士同茅台博士雙「學位」喎。
翻查資料，原來貪湯嘅博士銜係喺○八年獲中國人民大學頒授嘅，仲係一位法學博士添，究竟點至可以得到呢個學位，就不得而知嘞。茅台、牛雜魚蛋、食飯分單入帳、政協同博士都不期然令人聯想埋一齊，都係唔慌好嘅聯想。
唔知貪湯今次去北京有無帶茅台呢？不過，全國政協常委陳永棋就疑似揶揄貪湯嘞，佢尋日喺機場被問到帶咗啲乜嘢上京，就話自己唔飲酒，所以一定唔會帶茅台喎。
賴死拒辭政協職務
貪湯尋日下午去到北京，記者們又係問佢擔唔擔心被刑事調查，佢話唔擔心，問佢會唔會辭去政協嘅職務，佢話唔會，仲大仁大義咁，話做政協係義務工作，不涉利益，問佢會唔會戒酒，佢斬釘截鐵話唔會，佢又話任廉政專員時舉辦嘅聯誼活動，唔係為做政協鋪路，又話配合立法會嘅調查，睇唔到自己有乜嘢涉貪。厚面皮到咁，各位仲有乜嘢問，咪即管問囉，佢都百毒不侵咯。