中環出更：潘少爭取開議員診所
立法會議員每月有八萬七千四百零蚊酬金，每年另享有三萬幾蚊醫療津貼，同一般打工仔比算係唔錯。不過勞聯立法會議員潘兆平（潘少）日前出席勞工界甲午年新春酒會，就代表其他同僚出頭，話希望立法會附近可以開番間議員診所，等佢哋一有頭暈唔舒服就可以去左近睇醫生，而唔使因為要去中環或灣仔睇醫生而開唔到會。
潘少話自農曆新年後就覺得有啲唔舒服，之後又要畀忽冷忽熱嘅天氣搞到感冒，病足幾個星期都仲未好番。立法會早排審議「雙辣招」印花稅條例草案期間，潘少原本諗住偷偷地搵個時間「蛇」出去睇醫生，不過由於部分議員不時響鐘要求點算法定人數，或者要坐定定留喺議事廳入面等投票，搞到佢唔可以如願偷走。再加上立法會喺嗰幾日開會開足十三個鐘，開完會醫生都收晒工，終於令佢拖足幾日都無法睇醫生。
咁不如立法會內設立診所啦，方便一次過收集議員嘅病歷，醫生又可以開瀉藥畀立場唔啱聽議員集體服用添。
卓妮