中環出更：港政協上京 送機一刻冧爆
全國人大政協兩會即將舉行，港區人大同政協尋日紛紛出發上京。就尋日喺機場所見，有政協委員有另一半嚟送機，例如全國政協汪明荃就有老公羅家英送機，立法會議員梁美芬就嚟送全國政協老公王貴國嘅機，真係溫馨。
Liza姐 家英哥 戴情侶超
卓妮尋日咁啱經過機場貴賓室時，就見到身兼八和主席汪明荃（Liza姐）有老公羅家英嚟送機，Liza姐披住紅色頸巾，拎住紅色手袋，連兩個帶上京嘅行李篋都係紅卜卜。只見早前啱啱完成腫瘤療程嘅家英哥坐喺車上，依依不捨同Liza姐握手講拜拜，兩人都戴住黑超，甜到不得了。
梁美芬就送老公送到入機場貴賓室，後來梁美芬揸車離開機場，王貴國一直目送，直至離開佢嘅視線範圍至掉頭去辦理登機手續，兩人結婚多年兩個仔都好大個嘞，感情一樣咁好，真係羨煞旁人。舊年都有老公黃定光嚟送機嘅全國政協林淑儀，今年就要黐實好姊妹全國政協陳婉嫻架車搭，唔知黃定光有乜事忙得咁緊要唔現身呢？而嫻姐早前感冒啱啱好番，所以戴住條大頸巾。
北京又凍、又乾燥，又有霧霾，身兼創興銀行副主席嘅全國政協委員梁高美懿都係一個人現身，佢話，除帶咗潤手霜同護膚品之餘，仲帶埋川貝同羅漢果，用嚟沖水飲潤吓喉咁話。而全國政協委員盧文端就攞住個裝住熱辣辣漢堡包嘅紙袋行入貴賓室，佢話因為未食早餐喎。全國政協方黃吉雯着住長靴，手攞住件顏色斑斕嘅大褸上機，搭飛機都扮得咁靚，真係好積極嘅生活態度囉。
卓妮