如果，命運能選擇，十字街口你我踏出的每步更瀟灑。大家不妨幻想一下，民主黨立法會議員何俊仁同財政司司長曾俊華嘅命運對調，何俊仁喺台上發表一份悶到嘔嘅爛鬼預算案，曾俊華喺台下唔係呵欠連連瞌眼瞓，而係不務正業利用平板電腦瀏覽大量足以令人噴鼻血嘅艷照，呢一個着三點式，嗰一個露事業線，玲瓏浮凸風華絕代勾魂攝魄，你估民主黨中人會有乜嘢反應吖嗱？
唔使講啦，假如身為問責高官嘅曾俊華居然成個鹹濕伯父糟老頭咁樣公然睇艷照，頭殼頂永遠有道德光環閃閃生輝嘅民主黨徒一定會歇斯底里嘈到拆天，你鹹濕，你下流，你卑鄙，你無恥，你賤格……譴責聲浪必然鋪天蓋地而來，然後就會有人動議，要求色中餓鬼曾俊華鞠躬下台，為自己嘅猥褻行為引咎辭職。
假如曾俊華賴死唔走，以「留下比離開更需要勇氣」嘅藉口死撐咯喎，道貌岸然嘅何俊仁九成九會吹雞號召民眾上街抗議，一眾盟友示威期間除咗抬棺材之外，話唔定仲要掟雞蛋添。總而言之，問責高官公然睇索女絕對係十惡不赦嘅滔天大罪，何俊仁唔剷到你上天花板就唔姓何！
之但係咁，以上所講嘅只係命運能選擇嘅假設，客觀現實係何俊仁唔可以踏出每步都咁瀟灑，事關公然睇索女嗰個鹹濕伯父糟老頭係佢自己，曾俊華只係負責喺台上透過財政預算案發放悶蛋。
由於外號鐵頭仁同AV仁嘅何俊仁太唔小心嘞，瀏覽動作盡收攝影機鏡頭之下，所以網民輕而易舉就可以按圖索驥，搜尋得出一眾「仁女郎」包括日本性感寫真女優原幹惠，內地女星就有被稱為「新生玉女模特兒」嘅商雪琳以及「新一代少男殺手」嘅孟希瑤同于欣萌。雖然好色係男人嘅動物性本能，即使頭殼頂永遠有道德光環閃閃生輝嘅政客亦不能例外，不過點都唔應該不務正業到咁眼冤吖。
由於民主黨一向嘅作風係嚴人寬己，所以就算真係咁鬼死眼冤，何俊仁都係輕輕帶過，企圖不了了之。佢話喎：「非常抱歉，大家都知我好少咁樣，可能因為近排太攰，做咗啲唔應該做嘅嘢，我就呢樣係要致歉。」
致歉就得？再一次假設命運對調，若然鹹濕伯父糟老頭係曾俊華，引咎辭職慢少少都會被民主黨徒怒掟毛公仔「路姆西」呀，怕且。
所以話啫，民主黨實在係雙重標準偽君子，自己站於道德高地嘅時候就死咬不放，自己站於缺德低地嘅時候就蒙混過關。都係網民講得啱，唔該「淫主黨」嘅「何盡淫」辭職下台！