財爺曾俊華（鬍鬚曾）剛發表嘅財政預算案備受批評，有電台聽眾鬧佢只扶助基層市民，對中產人士則「尖酸刻薄」，十足守財奴。鬍鬚曾就拒認係守財奴，仲透露自己嘅生活唔係咁保守，只係佢管理嘅公共財政唔係佢啲錢，所以先至咁保守嘅啫。佢強調要審慎理財，好好管理市民辛苦儲嘅錢喎。鬍鬚曾話自己嘅生活唔係咁保守，唔保守即係有啲進取啦，莫非佢平時除咗歎咖啡同睇法國電影外，仲係一個大花筒、洗腳唔抹腳嘅「中產」人士？
