政情：百仁才「俊」 帶學生訪內地廠
百仁基金近期活動多多，除咗三月底舉行嘅慈善跑之外，仲有推行「百仁導航計劃」，讓學生體驗唔同行業嘅實質工作環境，又會按佢哋嘅興趣同能力提供職業配對或實習機會。好似今年六至七月暑假期間，百仁基金主席李文俊（Raymond）將會帶領約二百名學生參觀旗下內地重慶嘅造紙廠。
公司預留十個實習職位
Raymond話，其實好多年輕人對行業認識都係局限於電視資訊，因而忽略某些新興行業嘅發展機會。例如佢公司就好需要環保工程方面嘅人才，但就搵極都搵唔到，相反好似金融、地產一類嘅人才就好多，競爭好激烈。講到今年六至七月嘅參觀造紙廠活動，Raymond就話其公司已經預留十個實習職位畀學生。
此外，基金一眾核心成員，現正忙於籌備下月底舉行嘅百仁慈善跑，副會長陳寧寧仲話自己細個都係運動健將，除咗跑過十公里賽事，仲曾經喺北京參加四百米及八百米賽事時攞過冠軍添。其他成員亦已陸續開始練跑，希望可以透過活動帶動港人運動嘅風氣。