政情：民記超選夢勇而不決？

陳勇回應指「十畫未一撇」

還記得二○一二年立法會選舉，各黨派為新增嘅五席超級區議會議席爭崩頭，最終建制派只係取得兩席，當中原來大熱人選劉江華以些微票數飲恨落敗，反而由九龍西轉戰超級議席嘅Starry順利當選，呢個結果都令好多政界中人大跌眼鏡。

據聞該黨最近開始研究超級議席前期布陣，首個方案係爭取收復失地取回兩席，除咗Starry會再披甲上陣，主力爭取港九票源，另一人選以陳勇嘅呼聲較高，事關黨內分析指陳勇同新界各門各派都有「打交道」，加上佢嘅新界社團聯會理事長背景，要全力動員新界人支持會較小阻力。陳勇接受查詢時形容，依家「十畫都未有一撇」，希望大家共同努力喎。

假設唔夠票爭取兩席超級議席，該黨會退而求其次只派一人上陣，呢個人既非Starry或陳勇，相反竟然係落入黨內另一名副主席張國鈞手中，點解？按分析，創黨主席曾鈺成已揚言會「裸退」，香港島嘅議席就要搵人接棒，由於張國鈞未到曾鈺成個級數，喺港島參選岌岌可危，所以到時由Starry轉戰港島區直選較為合適。

若只爭一席 或派張國鈞

相反該黨要取一席超級議席好穩陣，基本上派出邊個參選都贏梗，所以派張國鈞或大埔區議員黃容根參選都冇乜分別。

其實講到尾選舉布陣，除咗一廂情願外，最緊要係同其他友好黨派討價還價協調，到時就可以避免自傷殘殺兩敗俱傷，究竟民記如意算盤能否打得響，就要睇吓陳勇點放下身段爭取新界人嘅祝福同支持喇！