中環出更：議員倡設立會WhatsApp群組
立法會開會經常開足幾個鐘，好多議員中途都會離開會議廳舒展筋骨或處理其他事務。為免議員錯過發言時間、投票或流會，秘書處會透過傳呼機通知聯絡議員。不過，喺呢個「人人有手機」嘅年代，傳呼機幾乎要擺入歷史博物館，所以有議員就提議叫秘書處加設議員WhatsApp群組。不過，WhatsApp群組有人數限制，秘書處淨係諗點樣將議員分組都已經諗到頭都大埋。
有人數限制 分組困難
立法會有七十個議員，但WhatsApp群組每個最多只能容納五十人，加埋秘書處職員起碼要開設兩個群組。秘書處對於點樣分組都好頭痛，如果單以泛民主派同建制派分組，秘書處又驚被人質疑透明度同係咪公平公正，如果抽籤，部分議員又唔想被敵對陣營知道私人電話號碼，所以仍未有兩全其美嘅方法。
另外，依家表決響鐘五分鐘，議員就要返會議廳投票，比喺中環舊立法會大樓時多咗兩分鐘。原來秘書處喺立法會搬至新大樓時出動咗四十位職員幫手測試喺新大樓唔同角落行返會議廳要幾耐時間，最終就定咗五分鐘喇，所以班議員冇得賴唔夠時間返會議廳喇。
卓妮