中環出更:名人名曲 婦唱夫隨

高官太太唔易做,除咗要出得大場面外,原來仲要唱得。國際婦女會日前在尖沙咀文化中心舉行「名人名曲慈善夜」,好少露面嘅城中幾位官太齊粉墨登場,包括廉政專員白韞六太太付燕紅(Bonnie)、懲教署署長單日堅太太黃嘉敏(Carmen)等齊開金口。老婆上台,老公各人買定鮮花,一等老婆唱完歌就飛身上台獻花,認真醒目。

白韞六伉儷詩歌班結緣

講到唱歌,白太Bonnie同單太Carmen係專家。Bonnie自爆當年喺詩歌班唱女高音時,邂逅唱男高音嘅白Sir,真係「不唱不相識」。今次為慈善,Bonnie苦練兩個月,難得姊妹們好齊心,一拍即合。唱歌都係單Sir同太太Carmen的「月老」,兩人喺中學合唱團齊唱聖詩,單Sir唱男低音,Carmen就唱女高音,婚後兩人繼續「夫唱婦隨」。

「製衣女王」兼女童軍總會名譽副會長鄧慕蓮(Irene)當晚捐出十萬元支持善舉,更上台與眾官太合唱《迎春花》、《祝福你》等多首金曲,出錢又出力。Irene剛暢遊南非回港,勁擦手掌咁大嘅鮑魚,又狂掃十多箱紅酒,難怪唱起歌來心情大好,中氣十足。

獲一眾官太力撐,國際婦女會主席彭徐美雲帶頭以歌聲答謝善長,唱出《明日話今天》及《蔓珠沙華》等名曲,台風十足。彭太笑言,多得老公買部音響放喺洗手間,等佢沖涼時順便練歌。當晚共籌得一百七十萬港元,善款用作資助旗下老人中心服務。

卓妮

第一手消息請下載on.cc東網iPhone/iPad/Android/Windows Phone Apps