一個叫俊華嘅物體喺台上宣讀財政預算案，一條叫俊仁嘅麻甩喺台下偷窺少女模特兒，你話吖，香港嘅政治生態點可能唔墮落呢？
叫俊華嘅物體即係財政司司長曾俊華，宣讀最新一份財政預算案係就係悶到抽筋，不過點都係一件非常正經嘅事，台下出席嘅聆聽者點都應該畀番少少薄面，扮都要扮到專心聽書。點不知，民主黨立法會議員何俊仁唔知係覺得太沉悶，定係飽暖思淫慾，居然喺議事堂上利用平板電腦瀏覽性感女郎艷照喎。
本報記者眼明手快，即刻將何俊仁沉迷乳香四射事業線嘅猥瑣面貌拍攝落嚟，放上東網即時新聞，隨即引起廣大網民熱烈討論。網民廣大嘅意思係神通廣大，佢哋效率奇高好快就查出，俊仁窺淫嘅對象包括日本水着女優原幹惠、內地藝人商雪琳、孟希瑤以及于欣萌等等。唔單止本地網民熱烈討論，連國際網站都轉載咗佢嘅色迷迷嘴臉，搞到臭名遠揚，國際知名添呀。
外號鐵頭仁嘅何俊仁馬上認衰，承認冇盡忠職守，分心做出同立法會無關嘅事，原因係最近太累，為此向公眾道歉。民主黨主席劉慧卿就話嘞，提醒黨內議員，包括立法會議員、區議員或公職人士，要檢點自己行為，唔好做同會議無關嘅事。
唉，香港納稅人真係好鬼死氣頂，一來要供養一大班好似曾俊華咁嘅守財奴，二來要供養一大班好似何俊仁咁嘅鹹濕佬。過往立法會議員開會期間都係瞌下眼瞓或者扯下鼻鼾啫，家陣居然發展到睇艷照喎，你話唔眼冤就假啦！
你知啦，一條麻甩佬睇艷照好可能流鼻血，萬一立法會出現一攤攤血漬，你話點算好呢？污糟邋遢都仲係其次，令人誤會發生血腥恐怖命案就唔好啦，畢竟家陣風頭火勢好敏感，《明報》前總編輯劉進圖剛剛被斬多刀咋。
其實講真吖，民主黨黨員確係有唔少鹹濕佬，其中一個叫做何偉途，當年東莞召妓斷正被捕身敗名裂，結果搞到要退黨。另一個色中餓鬼係民主黨前總幹事陳家偉，同樣係因為召妓醜聞而搞到要退黨。
當然啦，好色係麻甩界嘅動物性本能，何俊仁睇艷照係佢嘅自由，之不過咁喎，作為一個公眾人物，而且平時扮到幾咁道貌岸然，要睇艷照都留番私人時間先至睇，點可以喺立法會上咁急色吖。再講吖，無論財爺宣讀財政預算案係幾咁沉悶，尊貴議員都應該為選民打醒精神留意每一章每一節，否則點解要用公帑出糧畀你呀？
何俊仁色迷迷，民主黨衰鹹濕，呢啲政客其身不正，又點能夠監察政府吖。正如網民話齋，與其獻醜，不如辭職喇，AV仁！