財爺尋日去立法會宣讀財政預算案，除咗公布政府開支外，其實仲講埋來年立法會使費。睇番立法會行政管理委員會嘅預算，自從去年開始擴展手語及普通話即時傳譯服務至所有委員會會議，行管會預計今個立法年度嘅相關服務時數，會由不足一百至四百多小時激增至一千小時，其中普通話傳譯更去到一千六百小時，對於弱勢群體嚟講，相信一定係好消息。
現今係資訊科技世代，立法會好多時都透過網絡發布消息，佢哋會用多啲網上渠道發放影片同相片，連帶今個立法年度瀏覽立法會網站嘅人次，預計都會達到七百萬人，即係平均每名市民一年都上立法會網站一次，多啲人知道立法會做乜都係好事。
立法事項愈來愈繁複，下年度立法會準備開設三十九個職位，約一半係要應付日益增加同複雜嘅工作，亦有一個新增職位係為咗推行公眾查閱檔案嘅新政策。加加埋埋咁多個項目，行管會來年預算約七億二千萬元，比今年度多約七個百分點，而結餘就有二千七百五十萬元，比今年度多六個百分點。