政情：財爺「讀書」悶 局長各自消遣
財爺曾俊華尋日宣讀新一份財政預算案，一班官員唔想悶到瞓着，惟有各出奇謀搵嘢解悶，但當然唔似得民主黨議員何俊仁上網睇索女咁離譜啦。發展局局長陳茂波就最醒，帶埋成疊文件去立法會睇，當其他高官不斷放蚊恰眼瞓，佢就不斷刨書睇文件，仲對住幾個圓形圖表研究咗好耐添。
蘇錦樑玩電話 黎棟國上網
唔知係咪驚畀傳媒再影到睇股票，教育局局長吳克儉今次唔敢再電話，仲將個電話反轉擺喺枱面，費事被人睇到電話自動彈出嘅訊息。不過，商務及經濟發展局局長蘇錦樑就經常拎起部電話同人WhatsApp，而保安局局長黎棟國就用手機上網睇預算案新聞，莫非佢覺得財爺講得太悶，上網睇精彩啲？
曾俊華太太黃蓮華尋日都有全程坐喺官員席聽住老公「讀書」，當社民連梁國雄衝上前向財爺掟假牙時，曾太就金睛火眼咁（目及）實對方嘅一舉一動，驚副假牙會好似隻雞蛋咁再次唔小心掟中老公。會後被問到點睇今年預算案，曾太就露出一個意味深長嘅微笑，拋低一句「佢年年都咁好」後就離去。