醜事傳千里呢家嘢，真係唔講得笑，香港嗰對「絕代雙貪」搞到連北大人都覺得難堪，你話幾咁瘀皮。
中央智囊機構中國社會科學院發表二○一四年《法治藍皮書》，其中一章講到「廉政風波」，開宗明義提到廉政係香港法治嘅核心價值，但近兩年「兩位高級官員行為令香港社會有點擔憂」，前年廉署決定立案調查前特首曾蔭權嘅貪污舉報，令「以清廉聞名的香港行政制度受到挑戰」，去年前廉政專員湯顯明亦遭舉報。
《法治藍皮書》點名談論湯顯明嘅貪腐醜聞，話佢引發嘅風波顯示社會對反貪嘅認同非常重要，否則唔會有人舉報。文章更加指出「傳媒自由非常重要，正是由於傳媒的敬業精神，才能把社會的關注聚焦在這一事件上」。
呢嗱嗱嗱，你話係咪該煨吖？明明香港係一個以清廉聞名嘅地方，點不知受到「絕代雙貪」拖累，家陣連中國社會科學院都睇唔過眼。雖然社科院喺國內唔係最高級別嘅權威機構，不過多多少少都反映咗中央嘅意見，起碼唔會同北大人唱反調先吖。換言之，北京方面對於貪曾同貪湯都有反感，否則《法治藍皮書》冇可能捉呢兩隻嘢出嚟開刀。
講到呢度，功夫茶實在有必要對號入座，香港邊一家傳媒機構居功至偉？關於貪曾案同貪湯案，正正係由於東方報業集團嘅敬業精神，先至能夠將社會關注聚焦喺呢兩隻嘢身上咋！
冇錯，傳媒自由非常重要，如果冇咗傳媒自由，香港第一貪官根本冇可能現形。就係兩年前，東方報業集團發揮第四權嘅監察力量，透過一系列獨家報道狠狠地將曾蔭權嘅貪婪面目大白於天下，全人類先至知道佢貪遍海陸空，從而暴露特區政府係幾咁墮落。至於湯顯明咯喎，東方報業集團一樣不遺餘力，嫉惡如仇嘅精神人盡皆知。
所以話啫，傳媒自由確係必須誓死捍衞，藉此保障廉政作為香港法治嘅核心價值。之不過有一點係非常可惜嘅，就係廉署查來查去都係得個吉，對於東窗事發已經兩年嘅曾蔭權仲未提出檢控。喂，好心現任廉政專員白韞六唔好再死拖爛拖啦，點都要盡快為貪曾案向世人清楚交代一下。
講真吖，貪官污吏同傳媒自由係水火不容嘅，貪官污吏必然會伸出魔爪企圖扼殺傳媒自由，而正義傳媒就要千方百計踢爆貪官污吏嘅醜陋嘴臉。喺咁嘅情況之下，請問各位親愛嘅讀者，大家會企喺邊一邊吖？正所謂，得道多助，失道寡助，捍衞傳媒自由，痛打絕代雙貪，維護核心價值，絕對係香港人嘅共同心聲！