中國係今年亞太經合組織（APEC）年度會議主席，中央明益香港，特登畀香港協辦APEC財長會議，有得做主人家財政司司長曾俊華（鬍鬚曾）之前仲話覺得好榮幸。點知尋日中央突然通報港府，財長會議將延期並移師北京舉行，舉動十分唔尋常。香港近來爭拗多多，有人話要佔領中環，又有人搞連串抗議活動針對內地遊客。唔知係咪怕咗香港咁多事幹，北京索性取消晒。原本諗住威水吓嘅鬍鬚曾，被殺個措手不及，今次真係火燒後欄囉！
