政情：施榮懷自爆喺理大學《易經》
香港中華廠商聯合會早前捐咗三千萬元畀理大，尋日舉行「香港中華廠商聯合會樓」命名儀式時，會長施榮懷（Irons）自爆與理大嘅淵源。原來佢五年前曾修讀過由岑逸飛執教嘅「《易經》與工商業管理的關係」課程，每星期要上節三小時嘅課，讀咗四個月，所以對理大有感情喎！
指中港矛盾屬陰陽失調
咁學完《易經》對人生有咩啟示？Irons話，《易經》好複雜，讀完只係有個基本概念，例如咩係陰陽調和。好似近排愈嚟愈深嘅中港矛盾，就係陰陽失調喇！大家應該諗吓點樣平衡。佢仲話自己過年前去澳門都試過俾啲行李篋轆到隻腳，但條街咁窄好難免，惟有互相包容，換轉係自己去到外國畀當地人驅趕都會唔開心咁話。
講番個儀式，施榮懷致詞時話自己最鍾意飲甜湯，事關理大校長唐偉章英文名係Timothy Tong，所以唔捐畀理大都唔得啦。咦！原來唐偉章同「貪湯」前廉政專員湯顯明個英文名一樣，唔知校長有冇覺得好冇面呢？