政情：譚志源為政改勁擦金融界鞋
為咗政改順利通過，政制及內地發展局局長譚志源都算做足功夫，差唔多每個界別邀請佢出席政改論壇，佢都逢請必到，而且例必賣花讚花香。尋日譚志源出席金融界政改諮詢論壇時，依然口甜舌滑，猛讚金融界對香港有幾重要，講到好似無咗金融界唔得咁。唔知譚局長下次去漁農界，又會講啲乜呢？
譚志源份人出名圓滑，雖然口才唔係特別好，但絕少講錯嘢得罪人。尋日佢出席金融界政改論壇，開場白已經大讚好重視金融界，因為金融界同政改好有關係。譚志源解釋，金融界同政改有兩項共通點，分別係有利資本主義發展，同兼顧各階層利益，仲話呢兩項正正係一國兩制下嘅精粹，無咗呢兩點完全唔得。
被笠高帽 張華峰得戚
譚志源咁大頂高帽笠落金融界度，在座嘅金融界拍晒手掌，連坐喺身旁嘅金融服務界議員張華峰都好得戚咁挺一挺個大肚腩，仲笑到見牙唔見眼。之不過譚志源吓吓落足鞋油，下次去見日漸式微嘅漁農業時，又會點兜呢？