中環出更：「官場三煞位」 食署屋署換人
政府尋日宣布高層官員調動，現任屋宇署署長區載佳即將退休，由屋宇署副署長許少偉升任署長；另外環境局副秘書長劉利群就會出任食物及環境衞生署署長。食環署同屋宇署近年是非多多，區載佳更曾被要求下台，兩位新署長坐住三煞位，日後都係醒定啲好。
近年，本港興起踢爆僭建風，屋宇署成為最繁忙嘅部門之一。不過申訴專員公署曾點名批評該署處理名人僭建有延誤。另一邊廂，署方員工因為工作量大增而吃不消，導致測量及技術人員大罷工，點名要區載佳落台，仲要求政府空降政務官去接掌屋宇署咁話。加上區載佳亦被指涉嫌僭建，可謂係屋漏偏逢連夜雨。
許少偉臨退休前坐正
可能呢個三煞位冇人想坐，所以政府並冇「空降」政務官，而係擢升許少偉算數。話時話，許少偉已經五十七歲，做多幾年都夠鐘退休，就算有咩唔着，至多咪好似海事處處長廖漢波咁，喺海難事件之後就退休，拍拍屁股走人囉。
至於食環署亦差唔多，該署由於外判員工多，管理漏洞百出，成日被踢爆剝削員工或員工蛇王醜聞，唔知幾時至執得正呢？
卓妮