中環出更:史立德全家出動助傷健籌款

香港傷健策騎協會早前喺君悅酒店舉行慈善晚宴,數百名城中名流盛裝出席,今次係協會年度籌款重頭戲,籌委會主席史立德(Allen)使出渾身解數幫手籌款,派出太太史顏景蓮第一次上台主持慈善拍賣,囡囡史佩加就化身模特兒展示慈善拍賣嘅珠寶鑽飾。喺賓客熱烈競投下,話咁快就有逾三百萬元進帳,總算不負眾望。

當晚出席名媛及名人多不勝數,包括會長楊國琦、馬會大董陳南祿、百利建集團董事總經理陳正欣夫婦等。「翡翠皇后」董吳玲玲細仔董必政(Donald)亦招呼一班朋友去支持,席間有位高挑英俊嘅後生仔,睇真啲原來係賭王三太陳婉珍嘅細仔何猷啟。猷啟話,佢去年讀完書返港,依家幫媽媽打理房地產和股票生意。Donald話,去年佢參加一個內地交流團,猷啟都係團員,兩人初相識就好啱傾,仲成為好朋友添!

數百名人撐場

教育學院校長張仁良及法籍太太Christine亦拍拖到場,好多人都知張太講得一口流利廣東話,估唔到佢仲有個中文名叫張雪婷。張太話,學講廣東話方便同人溝通,生活先冇咁悶喎。

最近即時通訊程式WhatsApp以一千四百幾億元高價賣畀社交網站Facebook,打工幾年嘅員工都有得分四億幾元,成為佳話。「耳機大王」富士高集團主席楊志雄及電子商會副會長嚴玉麟都話,呢單交易顯示資訊科技行業前途無限,年輕人仲有好多機會發揮。

「九巴金公主」伍穎梅(Winnie)和男友許晉平亦拍拖到場,卓妮追問Winnie幾時拉埋天窗,佢甜笑話:「想要幾時就幾時!」睇嚟兩人感情穩定,隨時有喜訊喇!

卓妮

第一手消息請下載on.cc東網iPhone/iPad/Android/Windows Phone Apps