中環出更:政商界三支公 煮湯圓宴長者

近排唔知吹咩風,政商學界男人爭相煮湯圓,繼早前科技大學校長陳繁昌趁情人節搓湯圓之後,尋日輪到勞工及福利局局長張建宗(小肥張)。小肥張應邀出席中華電力「和您一起過節 」午宴,佢同中電總裁潘偉賢(Paul)及營運總裁周騰輝齊齊着住圍裙,為一百七十位長者炮製愛心湯圓。

莊偉茵傍住 防小肥張出醜?

可能驚小肥張唔識下廚出醜,中電企業發展總裁莊偉茵一路傍住小肥張,難為小肥張仲好淡定話,佢喺英國留學時已經成日到唐人街買餸煮飯仔,蒸魚、煲湯都難唔倒佢喎!工程界出身嘅阿Paul就冇咁架勢喇,佢話平時只係間中煮個麵,唔似局長咁隨時煮「九大簋」都冇問題。

雖然阿Paul廚藝不精,但偏偏其公司鼓勵市民無火煮食,咁先至可以用多啲電,一眾高層免不了成日要扮下廚。阿Paul仲預告話,嚟緊端午節等大節日將繼續舉辦活動,同長者齊齊慶祝。睇怕阿Paul都要惡補定包糉、焗蛋糕等技術傍身至得嘞!

卓妮

第一手消息請下載on.cc東網iPhone/iPad/Android/Windows Phone Apps