政情:毓民踢爆李慧玲「三大罪狀」

上周三被商業電台「炒魷」嘅李慧玲隔日隨即舉行記者會反擊,將解僱事件同新聞自由扯上關係,又話「封咪」要求係由政府最高層官員下令,作為商台未來續牌嘅條件之一。

出席論壇 李遭圍插

不過,立法會議員黃毓民尋日就喺由佢主持嘅網台節目上踢爆李慧玲「被炒」三大罪狀,包括李慧玲主持嘅節目收聽率下降、喺節目中多番批評商業電台,同埋準備過檔由黃楚標為大股東嘅香港數碼廣播(DBC)。不過,李慧玲同日出席《城市論壇》時矢口否認搵到其他工。

中原集團創辦人施永青同時事評論員劉銳紹都認為,凡事都應該提出證據,施永青更透露旗下報章時有抽廣告情況,不過佢唔會將事件提升至言論自由層次,又暗寸李慧玲唔應該隨便扣人帽子。論壇現場就有廿幾個觀眾起晒哄,認為商台炒李慧玲炒得啱,又鬧佢係「臭口玲」,搞到李慧玲最後要差人護送離開。

第一手消息請下載on.cc東網iPhone/iPad/Android/Windows Phone Apps