一年一度嘅渣打馬拉松今日開跑嘞！功夫茶之所以隆而重之介紹，皆因香港體育運動一向麻麻地，大型賽事唔多，只有呢項馬拉松最引人注目，參賽人數年年創新高，而且包括唔少外國好手，成為本港難得一見嘅體壇盛事，連港府都唔執輸，稱之為「香港品牌活動」添。不過咁，盛事歸盛事，功夫茶有個溫馨提示，近日天氣寒冷，加上空氣污染指數爆晒燈，參賽者最好量力而跑，以免樂極生悲吖。
唔係危言聳聽。呢，日前本報記者聯同兩名將參加今屆馬拉松嘅跑手，喺貼近準賽道嘅模擬跑道測試空氣質素，發現微細懸浮粒子（PM2.5）濃度均超標，其中西九龍及港島跑道屬污染黑點，PM2.5最高濃度超出世衞標準逾一倍，而葵涌段跑道亦平均超標近三成。喺咁混濁嘅環境下跑馬拉松，你話點頂吖？正如醫生話齋，高濃度PM2.5可能令患有心肺疾病嘅跑手病發；亦有立法會議員質疑，冇理由運動員跑一次馬拉松就要搞到五勞七傷。
冇錯嘞，跑馬拉松本來係為咗強身健體，萬一唔好彩跑出事，咁就冤哉枉也。大家咪以為講笑吖，繼○六年馬拉松搞出人命之後，前年亦有一名本地跑手暴斃，另外近四十人送院，都咪話唔得人驚。即係咁，跑步跑出人命，可能有好多原因，包括跑手本身健康有問題，但無論點都好，空氣質素欠佳絕對係其中一個主要原因。
呢嗱，中文大學研究發現，喺空氣污染嚴重嘅日子，出現上呼吸道疾病嘅風險相應大增，當中以高腐蝕性污染物「二氧化氮」對人體損害最大。老實講，香港烏煙瘴氣，好多人平時行街都會覺得侷促喇，何況仲要充當人肉吸塵機，跑四十幾公里長嘅馬拉松，有人出事一啲都唔奇。
講嚟講去，又係港府治污不力埋下嘅禍根。當局早排推出「空氣質素健康指數」，代替沿用咗二十年嘅空氣污染指數，將健康風險分為五個級別，話就話要逐步減少污染物排放，改善空氣質素，但究竟做唔做得到，睇怕連港府自己都未必有信心。你知喇，港產官僚眼高手低，搞環保一向得把口，從未做過一齣好戲畀人睇，旨意佢哋換回藍天白雲，蚊都瞓蛇都死喇。
立法會議員批評港府遲遲未能改善空氣質素，窒礙本港舉辦國際體育賽事，亦容易招人話柄。其實計功夫茶話齋，招人話柄事小，影響健康事大，港府幾時至肯認真解決問題呢？無論點都好，一年一度嘅馬拉松唔止係「香港品牌活動」，亦係備受國際關注嘅體壇盛事，千祈唔好再搞出大頭佛吖！