公民講場：廢鑊跨代遺禍 雞販硬食鐵價

一隻供港內地活雞被驗出H7N9禽流感病毒，不但連累港人被迫三星期冇活雞送飯，連帶雞農、雞販都冇雞賣血本無歸，當中唔少雞販將矛頭直指前食物及衞生局局長周一嶽，批評佢任內拒絕分流兩地活雞批發，最終一隻內地雞有事就一刀切殺雞停售。話口未完，食物及衞生局副局長陳肇始尋日重申，政府只會向每隻雞出價三十元買入，無論係被銷毀嘅活雞定超齡雞，兩種雞嘅議價空間都唔大，因為政府早喺○八年已經收番部分雞牌，選擇繼續經營嘅業界係要承擔香港再爆發禽流感嘅風險。前朝欠落嘅債，現屆政府只肯鐵價不二、出三十元買雞，受影響雞販唔知會唔會睬佢呢？