政情：張德熙48小時戒48年煙癮
政府近年耐唔耐就推出廣告勸告市民戒煙，財政預算案公布在即，又有唔少團體要求政府加煙稅，但呢一切又係咪真係可以幫市民戒煙呢？相信脫離煙民行列嘅金銀業貿易場理事長張德熙嘅故事可以話畀大家知，咩先係戒煙嘅好方法，皆因佢有四十八年煙齡，結果只係用咗四十八小時就戒甩煙仔，係咪好神奇呢？
張德熙話，本來都冇諗過戒煙係咁容易，但自從政府實施室內及公眾地方全面禁煙之後，就覺得着住西裝冇理由周街打邊爐嘛，而且好辛苦咁落到辦公室外吸煙，搭完升降機返到辦公室，煙癮又起，所以咪決心戒咗佢囉！咁如果政府加煙稅又點睇呢？佢就話，加煙稅嘅最大得益者可能係啲水貨煙，因為煙民實會搵到平煙買咁話。
不過，政府嘅政策某程度上，一定會幫咗部分煙民戒煙，因為佢就係一個活生生嘅例子喇。其實講到底，要成功戒煙係要恒心嘅。