政情：卿姐旺過頭 長毛好大鑊
新正頭最好講吓流年運程，我哋早前已請來香港術數家協會術數師楊子東批算過政府高官嘅馬年運程，今日就輪到一班立法會議員，當然七十個議員好難講得晒，所以主要點出有問題嗰幾位議員，等佢哋可以留意趨吉避凶。楊師傅推算，馬年泛民黨派有議員行為過激，做事踩過界甚至惹官非；建制派中人則口舌招尤，亦有議員遭遇假桃花；至於年紀大嘅議員就要注意身體喇！
新一屆立法會踏入第二個農曆新年，楊師傅從諸位議員八字中嘅年、月、日三柱睇到，議員劉慧卿馬年大旺，但就可能自恃大旺而「以為自己好掂」，因而鋒芒過露，做咗出位過激嘅行為，但講緊嘅「過激」行為唔係選特首，楊師傅仲話卿姐即使想選特首，都只係一閃即逝嘅念頭，反而建議卿姐要多小心婦女病咁話。
Ann蔣九月「講乜都有人噴」
至於上庭當食生菜嘅社民連梁國雄（長毛），楊師傅就批算佢流年不利，尤以上半年更差，其中正月「勞而無功、小心官非」，不諱言長毛「可能好大鑊」，又話佢「搞搞震冇乜好結果」。即使捱到九月依然「傷官見官」，容易惹小人是非、官非喎！長毛腳患啱啱先好番，馬年又預測有官非纏身，確係流年不利。
建制派方面，楊師傅特別批算平日已經語出驚人嘅鍾樹根同蔣麗芸（Ann），二人馬年都繼續係「口舌招尤」，其中阿Ann「忙而無功」，特別要注意農曆九月會因口舌招尤之事再受攻擊，更警告阿Ann九月「講乜都有人噴」。
蜜運中嘅陳克勤（Gary）農曆七、八月就有桃花運，可惜一閃即逝，「真桃花」要等到一六、一七年先至出現，同普選之路一樣咁漫長，愛情路似乎頗坎坷喎。至於工聯會另一單身貴族麥美娟（Alice），楊師傅預測Alice十一月會有桃花但唔長久，更告誡Alice「言多必失」添。議員係咪行桃花運唔重要，最緊要係合選民眼緣啫！不過，運程呢啲嘢「信則有、不信則無」，毋須太過認真嘅！