中環出更：劉健儀爆囝囝曾遭外傭虐待
印傭Erwiana遭僱主虐待案件，搞到全城聲討該僱主冇人性。港區全國人大代表劉健儀（Miriam）經常企喺僱主嗰邊，佢解釋並唔係偏幫僱主，亦唔認同僱主以暴力手段對待外傭，但事實上有唔少例子係外傭出問題，好似佢就有一次親身經歷，受害對象仲係當年得幾歲嘅愛兒。
Miriam話，差唔多十幾年前，囝囝仲係三、四歲，經常沖完涼都唔舒服。終於有次被佢發現，原來外傭姐姐竟然叫囝囝剝光豬，但唔係沖涼，而係喺浴缸罰企，捱凍吹風。不過，發現時已經太遲，佢囝囝已搞到肺炎入院，就算即時炒咗個外傭，都要賠一個月人工同機票，事隔咁多年都覺得好唔抵。
「篆書」寫揮春搶手
新正頭，寫得一手好字嘅Miriam，早前依舊到唔同地區寫揮春，佢今年仲專登拜師學藝，以「篆書」寫揮春，有街坊等足半小時都要攞到佢張揮春，搞到Miriam廁所都唔去，寧願寫多幾張喎。
卓妮