中環出更：台灣幫團拜 齊讚「東網台灣」
港澳台灣慈善基金會尋日喺尖沙咀新港中心會所舉行新春團拜，台灣幫齊賀新禧，現場有多款台灣過年糕點，廚藝了得嘅台灣新抱們亦自備拿手好菜分享。台北經濟文化辦事處處長嚴重光見到卓妮就對「東網」讚口不絕，尤其係近排銳意強化台灣資訊及評論陣容嘅「東網台灣」，嚴重光話係想多了解台灣嘅港人必睇嘅網站，佢仲豎起拇指話：「東網讚！」
基金會創會主席林添茂都話，佢由台灣到香港定居四十幾年來，日日必睇《東方日報》，依家「東網台灣」及時報道台灣訊息，取材係原汁原味台灣味，令旅居香港嘅台灣鄉親可以藉此多啲了解鄉情。
講番團拜現場，出席嘅仲有基金會主席何玉美（Emma）、副主席陳趙滿菊及羅台秦，何玉美親自炮製暖笠笠嘅黑薑冬瓜茶，基金會前主席兼好易通老闆錢立祐太太楚傳萃就帶私家秘製嘅酸豆角及嗆白菜，仲有基金會副主席林俊杰太太林李琴炮製八寶飯，個個食得甜到入心。
Emma話，今日會所亦將招呼一班特別嘅客人去會所過個台灣年，就係辭去百萬年薪免費為貧困青少年補習嘅前中學校長陳葒及幾十位基層學生，Emma話，希望喺任內搭建更多愛心平台，為社會散發正能量。
陳愛蘭冀港青留台創業
現場仲有台灣經濟部駐港機構遠東貿易中心主任陳愛蘭，佢啱啱升職取代卸任返台嘅前主任陳光丕，係該中心成立近三十年嚟首位女主任。陳愛蘭話，香港年輕人興起到台灣讀書工作，佢希望多啲港青留台創業，為台注入新血。今年係台灣經濟突破年，港台產業亦可攜手開拓商機。
卓妮