人類最基本嘅生活條件係三餐一宿，偏偏一個宿字搞到香港人滿腹牢騷。無他嘅，本地住宿問題非常之咁頭痛，一貧如洗嘅草根階層固然難以安居，就算係收入唔錯嘅中產階級亦都係叫苦連天，想話買一個私人物業單位享受一下自主空間嘅樂趣之嘛，竟然係一件遙不可及嘅事。
草根階層買唔起樓，最大嘅心願莫過於獲得編配入住公屋，上樓嘅喜悅簡直好比中六合彩。係嘅，冇錯，新落成嘅公屋設計確係幾好，不過部分舊式屋邨就不敢恭維嘞，用家被迫進入非人生活嘅居住模式。好似屯門寶田邨咁吖，你估單位裏面個廁所有幾大吖嗱？簡直係陰功豬，廁所面積不足一平方米呀，問你死未！
廁所面積太細，一來轉身都有難度，二來極之容易受傷，萬一住客係上咗年紀嘅公公婆婆，轉身受阻撞得兩撞，搞出人命都有之。於是乎咯喎，房屋署早前宣布為寶田邨嘅「蚊型廁所」進行擴建工程。
之但係又咁，特區政府嘅官僚作風係踢一踢郁一郁，你唔踢，佢唔郁。其實同樣有蚊型廁所嘅屋邨唔止寶田邨，同期落成嘅天水圍天恩邨都有類似嘅問題，竟然冇一併納入擴建之列喎，你話房屋署係咪因循苟且吖？
天恩邨第一期喺○一年落成，同寶田邨一樣係中轉房屋設計，廁所面積亦係不足一平方米，絕對係細到冇朋友，老夫老妻想話試下鴛鴦戲水係絕對冇可能嘅事，今年情人節撞正元宵節浪漫一下都唔得。
鴛鴦戲水都仲係次要，你知行動不便嘅老人家係需要互相扶持啦，去廁所有個伴照應點都安全啲。弊就弊在蚊型廁所冇可能容許兩個人同時存在，咁就構成家居意外嘅莫大風險嘞。
蚊型廁所仲有一道難題，就係沖完涼冇辦法喺入面着衫，所以用家被迫衣不蔽體走出客廳穿上衣服。喂，今年冬天特別冷，呢兩日凍到十度以下，沖完涼冇衫着行來行去，容乜易凍到病呀，撞鬼！
房屋署承認，天恩邨第一期總共有三千五百二十八個單位，廁所面積一般細過一平方米。既然細得咁交關，而寶田邨都有擴建工程，天恩邨係咪應該一視同仁呀？本來呢，係冇嘅，不過呢，由於踢一踢郁一郁嘅習性，房屋署家陣話有嘞。經過本報記者查詢之後，佢哋發言人話喎，寶田邨嘅單位廁所擴建工程建議同樣適用於天恩邨，有關計劃仍在審議階段。
功夫茶又諗到另一樣嘢，幾歲細路哥識唔識得自己沖涼嘅呢？如果唔識，為人父母又點樣喺一個不足一平方米嘅廁所幫仔女沖涼呢？所以話啫，當初嘅粗疏設計簡直唔當住客係人，後知後覺嘅房屋署快啲擴建啦！