今個農曆新年特別熱鬧，除咗西方情人節會同中國嘅傳統元宵節重疊之餘，香港客屬總會仲會趁許願節首次在林村舉辦盆菜宴，筵開近六百圍與客家人一齊歡聚，預計會有近五至六千人參與。
每年新年，林村嘅許願樹都會成為市民參觀嘅熱點，市民拋寶牒之餘，初一巡遊過嘅花車亦會停留喺林村畀市民欣賞。香港客屬總會總幹事彭叔平就話，食盆菜呢個傳統喺林村一直都有，每逢大時大節或有婚嫁慶典村民都會食盆菜慶祝。
佢又話原來香港嘅客家人有成二百萬咁多，而新界就係好多客家人嘅主要聚居地，所以喺嚟緊星期日舉行嘅「客屬迎春聚鄉情」活動就選擇咗喺林村擺盆菜宴，係首次以呢個形式聚集一眾喺本地嘅客家人，非常高興。佢地仲邀請咗好多新界社團領袖、新界鄉事首長及各大商會會長等出席，包括林村鄉代表鍾偉強、大埔區區議員張國慧及陳笑權等。
自細就喺魚角村長大嘅張國慧非常熟悉客家鄉土文化，佢話到時除咗食盆菜，仲會有文化嘅展覽，會展出好多傳統嘅客家服飾、農具、及一些客家人慶祝喜慶日子嘅禮俗細節。食飽仲可以趁許願節去許願廣場點燈祈福同睇客家武術表演添。