政情：泛民教協 民望插水

監事會選舉抹黑風波影響

香港研究協會喺上月三十日至本月六日，成功訪問咗一千一百多名十八歲或以上市民，就喺立法會擁有議席嘅十五個政黨政團支持度評分，結果顯示教協雖然仍然位列榜首，但實質評分卻應聲下挫零點一三分至二點七四分，調查機構直指係同即將舉行嘅教協監事會選舉爆出抹黑風波有關。雖知教師有激進亦有保守，唔少教師更加係純粹為咗可以買嘢平啲先加入教協，今次內訌同互相抹黑對各方都唔係好消息，評分急跌實屬理所當然。

今次調查又顯示，九個立法會泛民政黨同政團當中，有六個都評分下跌，其中現任主席劉慧卿同前任主席何俊仁，分別畀人掟中衣架同毛巾嘅白鴿黨，評分顯著下跌零點零八分，至只有二點五八分。其成員有份掟人嘅人力亦唔好得好多，評分微跌零點零一。另一經常掟嘢嘅激進泛民政黨社民連，更加跌咗零點零九分至只有二點二二分。另外街工、民協嘅評分亦都下跌，即係無分激進溫和都齊齊插水。

馮檢基死撐「泛民無分裂」

泛民內訌加劇，整體評分下跌，但身為泛民飯盒會召集人嘅馮檢基仍然自我感覺良好。佢尋日同傳媒茶敍時堅稱泛民並無分裂，並舉例指有參與飯盒會嘅廿三泛民議員，喺過去短短四個月曾經進行過十二次聯署，其中九次為全部廿三人都有簽，只有三次唔齊人喎。不過阿基無計算到無加入飯盒會嘅人力、社民連同黃毓民等四位激進泛民議員，舉例方法好有問題囉。

公民黨黨魁梁家傑尋日亦有同傳媒茶敍，句句寸爆白鴿黨。佢強調「佔領中環」之所以有咁多人支持，主因之一係無同任何政黨掛鈎，又指公民黨一早已有成百人簽署咗佔中意向書，但係就唔會好似白鴿黨大鑼大鼓搞佔中宣誓儀式囉！佢又大讚提出「公民提名」嘅學民思潮有創意，強調各泛民必須就政改問題綑綁埋一齊，明寸對「公民提名」立場飄忽嘅白鴿黨。睇嚟呢場泛民分裂大戲仲有排演落去！