中環出更：煮湯圓宴下屬 黃傑龍盼齊心
各大企業新一年業務要蒸蒸日上，勞資雙方減少爭拗站在同一陣線係最基本，好似敍福樓集團執行董事黃傑龍（Simon）早前趁年初七「人日」，特登與一班同事食開年飯，期間Simon同工作上好拍檔高秀芝（Grace）「拍住上」，除咗向員工大派應節利是外，更聯同其他集團高層一同煮三色湯圓，加上農曆新年前已向全集團約一千五百名員工派發加薪信，講到尾都希望新一年齊心事成。
同高層逐碗拎畀員工食
Simon嘅父親黃耀鏗一直對集團有情意結，而且對員工都好有人情味，Simon對於集團嘅良好傳統當然蕭規曹隨，早前趁「人日」和同事食「開年飯」，黃耀鏗同集團高層親自落手煮湯圓，煮好仲親手逐碗拎畀員工品嘗添。Simon話，佢哋煮嘅係三色湯圓，有紅色、黃色同白色三種顏色，分別寓意鴻運當頭、黃金滿屋同一團和氣。
除咗黃耀鏗，多名集團創辦人當日亦係坐上客，佢哋回憶集團發展點滴，自言集團首間酒樓開業至今已有四十多年，儘管依家面對租金、原材料價格等不斷上升，經營方面自然有一定困難，但幸好有一批盡責同事上下一心，其中部分同事更係中流砥柱，由當日初級員工榮升為店長，另有一家三口都係服務集團添。
展望未來，Simon為集團繼續發展大計多多，包括計劃引入外國優質品牌餐廳到香港經營，如果到時有著名品牌決定落戶香港，到時只要留喺香港都有食神喇！
卓妮