米飯係炎黃子孫嘅主要食糧，所以開餐泛稱食飯或者開飯，冇咗份工就叫打爛飯碗。既然米飯咁重要，食物安全中心係咪應該打醒十二分精神好好監測好好把關呀？
弊就弊在特區政府抽驗食物敷衍塞責，求求其其經常睇漏眼，如果唔係傳媒或者消委會踢爆，不知幾多問題食品流入市面。呢，消委會舊年十二月公布，本港有售嘅三款大米重金屬鎘含量超標，來源地係廣東同江西。為咗深入了解坊間嘅大米食用安全情況，本報記者走訪香港同深圳嘅雜貨店、街市以及超級市場，購買五個香港樣本同埋五個內地樣本，交畀香港標準及檢定中心檢測鎘含量。結果咯喎，有三款大米樣本驗出鎘含量超標！
根據《食物攙雜（金屬雜質含量）規例》，每公斤穀類食物嘅鎘最高准許濃度係零點一毫克，其中一款超標嘅係香港樣本，購自何文田超級市場嘅五公斤包裝粘米，鎘含量係零點一一毫克。
另外兩款超標大米更加嚴重，其中一款產自廣西嘅籼米，每公斤鎘含量係零點二毫克，超標一倍。另一款售價相同嘅江西米，超標情況最可怕，每公斤鎘含量係零點三毫克，比法例規定最高准許濃度超出兩倍呀！
簡單咁講，有毒大米通街有得賣，一個唔小心你就中招嘞，除非你係完全唔湊米氣，一粒飯都唔食落肚。
正如醫學界人士指出，人體一旦吸取重金屬鎘，會喺體內積聚而無法排出。長期食用含鎘毒米咯喎，會傷及腎臟以及肝臟等等排毒器官，有機會導致肝腎受損，患上慢性腎病同肝病，更加嚴重嘅甚至會致癌。除此之外，鎘又會代替鈣進入骨骼，令骨骼生長畸形，導致軟骨症。
講來講去其實就係食環署轄下嘅食安中心把關不力，正如立法會議員王國興話齋，黑心食品無處不在，流入本港情況令人擔憂，反映政府檢驗市面食品安全存在漏洞。
計功夫茶話齋，食安中心簡直係食塞米食到懵咗，所以累人累物累街坊，害到港人無奈食毒米。當然啦，內地負責種植稻米嘅相關人等都責無旁貸，如果唔係環境及農田受到污染，鎘含量都唔會超標咁多啦。
講開又講，國內嘅環境污染問題幾時先至可以改善呢？家陣空氣又十面霾伏，食水又五顏六色，靠山唔敢吃山，靠水唔敢吃水，再加上官商勾結炮製出咁多諸如坑渠油等等黑心食品，中國人自相殘殺，遲早絕子絕孫呀！
一句講晒，民以食為天，冇得食就癲。港產官僚，唔該你哋好好把關，唔好再渾渾噩噩呀！