政情：公民講場：「虎仔」發威 矢志滅「鼠」

民協剛於去年十二月完成換屆，廖成利（老虎仔）順利連任主席一職。平時斯斯文文、沉默寡言嘅老虎仔，尋日突然變得牙尖嘴利，話民協面臨「拔筍危機」（筍是民協標誌）。為咗穩固民協喺九龍西嘅地位，佢哋已經制訂未來三年大計，全力爭取二○一六年排頭位出戰立法會九龍西，口號就係「滅鼠行動」。嘩，擺到明係衝住梁美芬（鼠王芬）喎！老虎仔妙語連珠話，西九鼠患嚴重，唔清理就後患無窮，仲話自己叫得做老虎仔，即係同山貓同類，捉老鼠又點少得貓呢？老虎仔從政咁多年，好少咁生猛，睇嚟民協今次真係豁出去，預咗不成功、便成仁。