政情：拒談組黨 發叔扮乖

非也！發叔唔講啫，佢旗下啲鄉事委員會主席、執委等，對組黨大計表現得躊躇滿志。副主席林偉強話，組黨已迫在眉睫，而上水鄉委會主席侯志強更加激動，話同其他黨派上場無父子。呢啲仲唔係同發叔帶頭做曳仔嘅證據？

梁福元：組黨必然嘅事

鄉議局團拜之後，發叔藉詞身體唔舒服，避開記者靜靜咁離場。但係其骨幹成員就係咁解釋佢哋組黨嘅計劃，分工分得咁好，果然又真係有啲組黨嘅隊型喎。

雖然發叔封口，但其他骨幹就留喺現場做強硬派。林偉強話，組黨進行得如火如荼，新界人口多，所以有信心班底唔會太弱，又唔需要向其他黨派挖角。侯志強就話，鄉議局以往幫人抬轎當做運動，如果以後組黨參選就可以自強，始終自己發聲好過靠人哋喎。

佢講明「上場無父子，打仗冇面畀」。咁咪等於宣布同建制派決裂？侯志強就話時間尚早，唔使擔心咁多，因為依家係風雨欲來，又無定向，可能隨時雨過天晴。佢咁講，係咪暗示緊鄉議局隨時組唔成黨呢？十八鄉委會主席梁福元就話，組黨係必然嘅事，因為世上冇永遠嘅敵人，亦冇永遠嘅合作喎！

林偉強又話新界人多

不過林偉強上次講組黨時就透露咗，話鄉議局內有三分一人無鄉事背景，即係話佢哋根本唔夠人，但係佢尋日又話新界人口多，班底唔會太弱，死都畀佢講翻生，唔通就係要顯露政治人物嘅口才，不過空口講白話係無用嘅，遲啲睇下事態發展咪知道囉。