中環出更：李國能 張志剛 密會董建華
新年流流，政商界名人都忙於拜年活動，有人選擇以團拜方式，一次過見晒所有人，但仍有人堅持傳統，鍾意登門造訪。尋日係年初七人日，終審法院前首席法官李國能、行政會議成員張志剛前後腳到「前特首辦公室」會晤前特首董建華，唔通佢哋趁特首梁振英唔喺香港，去見「太上特首」？
趁CY放假 見太上特首？
尋日下午三點幾，李國能夫婦乘座駕抵達堅尼地城嘅前特首辦公室，不過只得李國能一個人落車，司機就載返李太離去。李國能兩手空空登門造訪，點睇都唔似係同董建華拜年咁喎！
過咗一個幾小時，李國能仲未離開，張志剛就嚟到，佢都係手揈揈冇帶嘢，唔通係同董建華有密偈傾？十五分鐘後，李國能施施然走出嚟，張志剛就坐到六點幾先走，睇嚟真係好好傾。
到底佢哋三人喺入面傾啲乜嘢？行先一步嘅李國能封口唔答，只報以微笑，令件事更添神秘。事後我哋問張志剛去搵董生做乜，張志剛就打官腔話，時不時都同各界人士會面，佢同董生只就香港議題交換意見，無乜特別喎！
卓妮