中環出更：貪湯厚顏 現身三軍會開餐
醜聞被揭一單又一單，好似改咗姓貪嘅「貪湯」前廉政專員湯顯明，最近又被踢爆喺二○一一年假公濟私，竟然叫外交部駐港特派員公署派出五名大廚到廉政公署搞「到會」，宴請三十九名外國駐港領事。事後貪湯仲向五名大廚送總值近八千元嘅酒杯。醜聞被揭穿，貪湯仍然唔當一回事，尋日中午大搖大擺現身三軍會用膳。究竟呢啲係EQ高，定係叫面皮厚？
尋日十一點半左右，貪湯由西貢寓所駕車出發，或者佢深知自己罪孽深重，唔敢再背負任何罪名，所以佢揸車時都幾守規矩，無超速、無衝燈、無過雙白線、無違例泊車，最後抵達三軍會用膳。不過，尋日係初七人日，應該係人人歡度生日嘅大好日子，但係偏偏貪湯形單影隻，全程唔見佢個「跟得女友」入境處前助理處長陳詠梅。因為一個貪字而搞到眾叛親離，睇見佢個孤獨背影都覺得悲哀。
拒回應豪搞「領事晚宴」
到底貪湯係咪用公帑送咗幾千蚊酒杯畀外交部大廚，公眾絕對有權知，市民亦好想知，所以我哋等佢泊好架車後，就上前問佢究竟當年發生咩事，同埋點解要咁做，擔唔擔心有利益衝突之嫌。
可惜貪湯聽到三條問題後，雖然保持笑容，但就未有回答任何問題，只係同記者講嗰度係私人地方，又話有個牌寫住，唔信可以睇睇。跟住佢又手指指話有保安嚟緊，擺明係想用保安作擋箭牌，迴避問題。貪湯食完孤獨午餐後，約三點半揸車返屋企，之後就無外出。
雖然貪湯唔敢講真相，但係立法會已決定兵分兩路追殺，分別喺專責委員會要求佢交代真相，亦有議員提出口頭質詢，質疑有中央駐港機構人員向公職人員提供利益。睇怕貪湯今次都係有得震無得瞓，想食啖安樂茶飯都難喇！
卓妮