生活環境都市化嘅代價之一係家居垃圾特別多，香港作為國際大都會，每日要處理嘅垃圾多到嚇死人。傳統處理垃圾嘅方法係攞去堆填，問題係堆填區總有一日飽和，咁點算好呢？環境局打算推出幾個方案，包括源頭減廢以及廢物回收。
施政報告提出，預留十億元設立回收基金，推動回收業發展，同時設定目標，三年內喺十八區設立社區環保站，展開教育及回收工作。現時本港約有四百至五百間回收商，唔同嘅回收物品需要唔同嘅支援，基金嘅資助對象同形式等等細節仍待商討。好明顯，玻璃樽係一種可回收物料，所以環境保護署冇耐之前表示，全港六十個屋苑同三十二間中小學增設玻璃樽回收點，配合日後推行強制性飲品玻璃樽生產者責任計劃，方便市民投入綠色生活。政府仲話喎，將會繼續同各界商討，進一步擴大網絡，目標係今年年底前將玻璃樽回收網絡覆蓋全港五成人口。
所謂強制性飲品玻璃樽生產者責任計劃，即係玻璃樽徵費計劃，根據環境局去年底提交立法會嘅文件指出，假如計劃落實，每年回收廢玻璃量可能有五萬噸，係二○一一年嘅十倍。文件披露，目前將廢玻璃製成環保地磚，每年僅吸納三千六百噸廢玻璃，若然將廢玻璃作為填海物料，每年吸納量可以高達五萬噸。
聽落似乎有少少道理，不過當你聽埋回收業界嘅意見，你就會豁然開朗，原來香港嘅環保官僚好鬼死浪費，簡直係暴殄天物！
呢，業界人士係咁講嘅，廢玻璃熔點較低，重塑為玻璃樽容器需要較少能源，深受日本以及馬來西亞等地玻璃廠歡迎，每噸市值六百港元，相反，將玻璃製成填料只值五分之一價錢咋。即係話，玻璃可以燒熔重塑一百次，掟咗落海就乜都冇，非常之咁浪費。
仲有一點好諷刺，香港嘅填海物料供過於求，每日接收四萬八千噸，每年超過一千七百萬噸，填料多到要貼錢送去內地處置，運輸成本四十三億元。既然已經有多到滿瀉嘅填料，點解仲要將相當值錢而且能夠循環再造嘅玻璃掟落鹹水海呢？所以話啫，環保官僚其實不環保，完全忽略咗回收物料廢物利用嘅大原則。
再講吖，填海已經成為禁忌，環保人士極力反對，回收玻璃作為填海物料根本唔係可持續發展嘅做法，你今年填海，唔通明年、後年以及大後年可以繼續填咩？相反咯喎，玻璃樽嘅回收量係源源不絕，收回可以再收，造完可以再造。好心環保官僚唔好暴殄天物啦，將玻璃送去循環再造先至係上策吖，知冇！