每次禽流感殺埋身，究竟港人應否吃活雞又會被重提一次，講真老朽聽至耳仔生繭，港產官僚做嘢，往往唔見棺材唔流眼淚；好似今次春節前禁活雞，搞到賣活雞嘅檔主雞毛鴨血，有檔主更要跳海以死威脅；政府才舊事重提，考慮分流本港及內地雞批發。
講開新春開年飯食無活雞，檔販市民齊斥周一嶽累街坊，皆因佢做咗食衞局局長八年，拒分流本港及內地雞；最令人激氣嘅係，周一鑊做嘢往往有頭威冇尾陣，○八年禽流感肆虐時，佢宣稱斥資十億元要取締活雞行業，高壓懷柔政策出齊，要雞販交還牌照，又咬牙切齒話鐵定二○一二年喺上水設立中央屠宰場，屆時賣活雞嘅都冇運行！
然而，一○年，周一鑊又話港人已習慣食冰鮮雞，加上香港防疫措施做得好，是以政府又放棄中央屠宰大計！
呢啲嘛就係本報評論常指出港產官僚做事「當斷不斷，必受其亂」囉！前朝廢官周一鑊為德不卒，好多政策講得出又做到唔湯唔水，市民及檔販鬧佢「唔用腦又無承擔」，確係一語中的！
講真，前朝官僚當斷不斷，今屆政府理應吸取教訓，撥亂反正，多做實事，唔好拖得就拖，趕快落實分流檢疫，若然要進一步防範禽流感，設立中央屠宰理應坐言起行，唔好學周一鑊講得出做唔到，拖出個無窮禍患。
歐陽修有篇《祭城隍神文》，提到他當地方官時，當地久雨成災，危害極多；一般的祭文，千篇一律向神奉承，而歐陽修卻「敢問雨者，於神誰尸」，他提醒神有神的責任，神而有靈，對這位敢為民發聲的官吏，恐怕也不能不賣帳。作為香港市民的「公僕」，理應顧及本地雞販、養雞者的生計，高官的責任不是做門面工夫，更不應討好內地，若香港活雞足以供給本地市場用家，全面禁內地活雞入口不失為良方。