教育局局長吳克儉真係「唔得掂」，之前推行國民教育全軍覆沒唔在講，去年處理北區學位荒問題又搞到一鑊粥，到最近教育局網頁又爆出將廣東話貶為「非法語言」嘅醜聞。日前該局急急撰文公開道歉，就連嗰篇補鑊文章都多處寫錯字，認真羞家。吳得掂局長衰完一鑊又一鑊，大有追上「每周衰一鑊」嘅前食物及衞生局局長周一鑊之勢，分別成為上屆同今屆政府嘅爆鑊之王！
