政情：單仲偕談區選 開年倒自己米
民主黨立法會議員單仲偕尋日喺佢屋企舉行新春團拜，煮咗多味應節中式佳餚招待傳媒，包括專程喺香港仔買番嚟嘅金蠔，購自深水埗、代表「富足」嘅腐竹，寓意「橫財就手」嘅蓮藕豬手，同埋無落魚翅、夠晒環保嘅秘製佛跳牆等，認真好意頭。
不過當談及稍後舉行嘅南區區議會海怡西選區補選，銑雞就即刻收起四萬笑容，直言自己無乜勝算，仲自爆無其中一位競選對手、人民力量主席袁彌明（Erica）咁勤力。大年初四就狂倒自己米，認真大吉利是。
讚袁彌明勤力落區
海怡西補選本周五開始接受提名，下月廿三日投票，以填補該區原區議員、前民主黨中委馮煒光辭職加入政府出任新聞統籌專員後嘅議席空缺，除咗同屬泛民主派嘅銑雞同Erica，預計建制派會派出新民黨成員陳家珮出戰。
銑雞尋日同卓妮講，最近幾次落區都見唔到陳家珮身影，但「空降」該區參選嘅靚女Erica，就比自己更勤力落區，仲不時向街坊派發香包等小禮物，估計至少會銑走佢五、六百票，令陳家珮漁人得利。總之佢今次都係盡力而為，成事在天喇！