新正頭政界拜年活動一籮籮，不過今年杯葛之風亦吹得正盛。無幾耐之前，特首梁振英（CY）被指下令要全體司局長杯葛自由黨黨慶，以示不滿該黨身為建制派，但又成日針對政府，搞到自由黨黨魁田北俊勁無癮。據聞田少密謀趁新春進行大報復，包括集體杯葛本月十一日，特區政府喺禮賓府搞嘅官式新春酒會。原定喺呢個禮拜五舉行，但因CY放假外遊而押後到廿四號先舉行嘅立法會新春午宴，自由黨暫時亦無人報名。
講開集體杯葛，早前中聯辦透過中間人邀請包括泛民在內嘅全體立法會議員食飯溝通，但因部分泛民堅拒進入西環中聯辦大樓而告吹。近日中聯辦再向泛民釋出善意，邀請佢哋出席本月十三日舉辦嘅中聯辦新春酒會。雖然酒會係喺灣仔會展、而非西環舉行，但社民連、人民力量同新同盟等激進泛民依然唔肯去，工黨就更加呼籲全體泛民杯葛酒會，以示不滿中央冇誠意落實真普選喎。不過民主黨同民協等一直有去開中聯辦酒會嘅溫和泛民，就決定會繼續派人出席，唔會好似田少或者工黨主席李卓人咁「小學雞」鬥玩杯葛！