政情：馬年多喜事 百里搶閘娶妻

預算案前夕成婚

好似平時怕怕醜醜嘅商務及經濟發展局政治助理陳百里，再過兩個多星期就會同女友拉埋天窗，仲揀正喺預算案公布前一日嘅好日擺酒，唔知百里新婚翌日會請假度蜜月，定係如常到立法會聽財爺發表預算案呢？

講起馬年政界喜事，據聞財經事務及庫務局局長陳家強都有份喎，不過當然唔係佢本人啦，而係佢大仔David至真。三月中David就會同拍咗拖幾年嘅韓籍女友Dina拉埋天窗，聽講Dina樣子甜美，曾經喺香港打工，其後轉往美國發展，結識到同樣從事金融業嘅David。陳家強係本港知名金融學者，之後離開大學加入「熱廚房」做官，主理財金政策，表現亦有板有眼，即使做老爺嘅David唔識得韓文，將來都肯定有大把話題同個新抱傾偈交流。