政情：會計界唔撐標時
勞工界近年力逼政府就標準工時立法，以免香港打工仔由朝做到晚都冇補水兼冇晒家庭生活，政府成立嘅標準工時委員會，亦即將就工時問題展開公眾諮詢，並會針對多個普遍工時過長嘅行業舉行座談會，包括出名有返工冇放工、有加班冇加薪嘅會計行業。不過，現任會計界立法會議員梁繼昌（Kenneth）同佢嘅選舉對手林智遠（Nelson），就同聲話唔支持同業受到標準工時規管，認真奇怪。
一般基層打工仔，對立法規管標準工時當然舉腳贊成，但原來同時有唔少行業嘅僱員反對立法，或者要求立法時豁免佢哋嗰行，其中會計界就係首個出擊表態嘅專業界別。
林智遠搜集同業意見
由Nelson擔任主席嘅會計專業發展基金，近日率先發表業界工時調查結果。調查喺去年十月中至十一月初進行，向會計同業發出逾五百份問卷，收集佢哋嘅工資水平同工時數據，喺收番嚟嘅三百三十多份問卷當中，近六成半受訪者平均一周加班兩至五日，逾四成人要長期加班，近八成人加班更不獲補償。如果以年齡層分析，三十五歲以下嘅年輕會計師加班情況最為嚴重，平均每周加班超過八個半小時。
班選民加班加得咁辛苦，大家實以為Nelson會支持標準工時立法啦？不過Nelson就指出，好多年輕會計師都同佢講，寧願要假唔要錢，即補假比補水更為實際，「標準工時未必幫到佢哋」。佢反建議業界參考日本同南韓企業做法，實施「出糧日，不加班」，相信可提升員工士氣，對企業運作影響亦比較輕微。
梁繼昌指推行有困難
我哋就Nelson嘅調查結果同講法詢問Kenneth回應，睇吓佢會否有唔同睇法，發現原來佢亦做緊差唔多嘅嘢，搵緊中大亞太研究所幫手，就會計界工時問題展開大型研究。雖然調查結果預料今年夏季先至出爐，但Kenneth直言毋須調查過都知，會計師唔係體力勞動工種，要推行標準工時係有一定困難，對於年資淺同較初級嘅會計師嚟講，提供加班補水可能會有少少意義，但對於較高層人員則未必適用嘞。