政情：中環出更：贊助賀年煙花 郭少明睇好香港
璀璨煙花初二照耀維港上空，城中名人齊集紅磡一間酒店歡度新歲。莎莎國際主席郭少明豪擲八百萬元贊助煙花，一於靚到底。「紅唇」、「粉紅小花」、「紅蝴蝶」綻放長空，祝願香港馬年更繽紛精彩。
郭生放煙花，太太郭羅桂珍、大女郭詩慧（Melody）、女婿陳振邦（Davis）及細女郭詩雅盛裝撐場，一身紅噹噹打扮的郭太，喜氣洋洋。郭生以鮮紅西裝襯番太太，可惜佢抱恙，聲都沙埋。講起生意經，郭生話仍然好樂觀，睇好今年零售業有增長。佢分析話，嚟緊高鐵、港珠澳大橋及新酒店相繼落成，深信香港競爭優勢會持續。
鄭錦鐘牛一 做六合彩監場
Melody同老公向來恩愛，就快到浪漫情人節，Davis已計劃畀太太一個驚喜。攜伴睇煙花嘅，仲有保良局主席鄭錦鐘（Eric），佢透露今天年初五係佢牛一，農曆同西曆生日喺同一天，碰巧六合彩新春金多寶搵佢夜晚監場，一度諗過推掉，最後決定嗰晚提早切蛋糕。Eric話，希望屆時領到四千幾萬元獎金嘅幸運兒，不忘捐錢畀保良局行善喎。港大校務委員會主席梁智鴻伉儷都帶埋細仔Eric湊熱鬧，阿囝喺東南亞一個跨國酒店集團任要職，平時忙到無暇陪父母過新年，呢晚三人行，認真難得。
煙花宴上，前保良局主席顏寶鈴孖埋前主席梁寶珠千金林玉茵欣賞盛況，兩人原來係契母女。顏太話新年有大計，過兩日飛孟加拉開帽廠，初步聘請千五名員工，稍後增至五千人，皆因內地經營成本上漲，要另覓生產基地先得。
卓妮