殺雞！殺雞！殺好多隻雞！
年尾流流大開殺戒，因乜事幹咁大吉利是呀？無他嘅，咪就係禽流感再一次兵臨城下囉。食物及衞生局局長高永文前晚召開「流感大流行應變計劃」嚴重應變級別督導委員會之後宣布，佛山順德區一個註冊供港雞場嘅活雞樣本，經PCR反覆測試證實對H7N9禽流感呈陽性反應。既然禽流感殺到埋身，當局決定展開殺雞行動，將長沙灣臨時家禽批發市場列為疫區，封場二十一日，場內兩萬隻活雞全數銷毀。
仲有兩日就過年，明日就係年三十晚，全人類都會返屋企食團年飯，試問團年飯以及開年飯居然冇活雞煮成佳餚，極其量只有冰鮮雞上枱，係咪好冇癮呢？中國人乜都貪新鮮，冰鮮嘅口感始終差一截。
唔怪得殺雞令一出，唔止食家失望，賣雞嘅叫苦連天，養雞嘅更加悲從中來。有雞檔檔主一聽到新春期間停售活雞嘅壞消息，即時啞口無言，相當無奈，原本估計年三十購入二百幾隻活雞出售嘅如意算盤當堂爛咗。冇活雞賣已經晴天霹靂啦，更加麻煩嘅係唔知點向客仔交代，好多人一早已經落訂買雞吖嘛，你話依家點算好？
本地雞農亦係慘絕人寰，業界慨嘆損失最少三百萬元，當然埋怨食衞局係把關不力嘅罪魁禍首啦。業界人士怒斥官老爺漠視訴求，業界十年前已經要求政府採取分流措施，分隔內地雞同本地雞。其中一個方案係分開不同家禽批發市場擺放兩地活雞，避免內地雞中招，本地雞陪葬，但政府一直闊佬懶理，終於令到業界無辜受罪。
計功夫茶話齋，自從北望神州出現咗咁多禽流感個案之後，內地雞早就要停止供港啦，咁咪唔使累到本地雞陪葬囉。本地雞農嘅提議其實值得考慮，佢哋要求政府特事特辦，即時重開西區家禽批發市場供本地雞批發，咁樣一來香港人有活雞過年，二來減少雞農損失，何樂而不為呢？
禽流感確係來勢洶洶，國家衞計委發表二○一四年版《人感染H7N9禽流感診療方案》，禽流感病毒或者通過接觸病毒污染環境傳播至人，不排除有限度非持續人傳人。本港衞生防護中心通報，內地至今共確診二百四十宗人類感染H7N9禽流感個案。另外有資料顯示，內地最少已有二十人感染H7N9死亡。大家必須記住，官方數字往往唔代表真實情況，疫情可能比想像中嚴重得多。
內地雞應禁不禁，好心食衞局唔好再防疫不力嘞，至少應該認真想辦法分隔內地雞同本地雞，等香港人有一個選擇吖嘛。