香港電台早前向立法會申請逾六十億元撥款興建新大樓，引起社會嘩然，之後港台喺壓力下為新大樓「減磅」，造價亦僅輕微下調七億多元，大樓主體建築幾乎一毫子都冇減過。商務及經濟發展局局長蘇錦樑尋日喺立法會一個委員會上辯稱，新大樓主體設計經過招標得出，好難中途更改。廣播處長鄧忍光更威脅話，如果新大樓撥款無法通過，港台就履行唔到行政會議賦予佢哋嘅新服務。將生米煮成熟飯，先至話畀食客聽要幾錢一碗，同啲黑店奸商有乜分別呢？
