政情：陳凱欣漏夜單挑雞農
靚太唔易做，原來靚太政助更加難做，隨時要單挑數十猛男！內地H7N9活雞攻港，食物及衞生局前晚宣布禁雞殺雞，一班受牽連嘅本港雞農火都嚟，幾十人漏夜衝去禮賓府，幾架裝滿活雞嘅貨車仲諗住喺禮賓府兜圈，一度與警方對峙。風頭火勢之際，凌晨一點突然殺出一位熟口熟臉嘅靚太，原來係食衞局政助陳凱欣，呢位前電視台新聞小花，風采依然，但有雞農就揶揄佢：「瞓醒嗱？」
去禮賓府解圍 局長冇影
有在場人士更埋怨，已為人妻及媽媽嘅陳凱欣似乎無備而來，臨時拉伕，一味只勸雞農返屋企休息，有咩事第二日慢慢傾，好在班雞農見到靚太咁辛苦都冇特別為難佢，擾攘多半個鐘就和平散去，陳凱欣大戰雞農都勉強算功成身退。有知情者話，前晚曾經call過局長高永文同副局長陳肇始，可惜一個飛咗去電話留言，一個唔喺香港，本來期望至少都常任秘書長或署長級人員到場調停，但最後要陳凱欣一個頂晒，認真慘情。