政情：羅傑承聞巨貪案黑臉
捲入澳門巨貪案嘅南華足球隊足主兼商人羅傑承，尋日下晝出席一項活動時，初時神情自若，但當活動儀式開始之後，就經常匿埋喺啲嘉賓後面又或企埋一邊，全程亦唔多出聲。直至儀式完結後，有記者問佢對於澳門官司嘅睇法時，佢就立即話「唔講呢啲」，然後黑臉急急腳離開。
檢察長指劉羅罪證確鑿
羅傑承同華人置業主席劉鑾雄，早前涉嫌以二千萬港元賄賂澳門前運輸工務司司長歐文龍，以獲取華置旗下澳門樓盤「御海．南灣」五幅土地嘅批給，被澳門檢察院控告行賄及清洗黑錢罪。案件經過長達半年嘅審訊，於本月中開始結案陳詞，助理檢察長陳達夫曾直指，綜合所有人證物證，劉、羅二人涉嫌行賄及清洗黑錢罪都證據確鑿，又建議法庭量刑從重，最高刑罰為入獄八年。