政情：鄧家彪郭偉強扮財神
立法會勞工界議員鄧家彪同郭偉強尋日現身維園年宵市場，扮財神向市民大派利是。二人只係分別戴上紅色及黑色財神帽，並冇着晒成套財神衫，皆因郭偉強兩年幾前已經扮過一次財神，因為佢太瘦唔似樣，搞到要着羽絨喺入面扮肥，焗到出晒汗，所以今年只係戴帽攞個意頭就算喎。
郭犯太歲 今年唔結婚住
講到派利是，唔知郭偉強同拍拖多年嘅女友，幾時先拉埋天窗派真正嘅利是呢？佢就話，馬年係佢本命年，犯太歲，所以全年運勢都可能會比較唔穩定，結婚亦未必趕得切，可能要再等下一年先得喇。至於新年佢就會留喺港度過，會趁初四至六放假期間，同媽咪一齊去攝太歲同拜年，而其餘日子就有工作在身。
睇郭偉強寫啲揮春，原來佢寫得一手好字，佢曾經做過王國興助理（阿王），唔知佢以前係咪跟阿王學書法嘅呢？佢話因為阿王太忙，冇時間教佢，但以前就經常企埋一邊睇住阿王寫大字，偷吓師，仲話啲人最鍾意叫佢寫「萬事勝意」喎。