政情：吳永嘉惹種票疑雲
傳統四大商會之一嘅中華廠商聯合會（廠商會），今年正值創會八十周年，而會長一職亦喺年尾改選，除咗掀起一場會長爭奪戰外，近日仲發生種票疑雲。我哋收到風，話廣東社團總會主席王國強（KK）創立嘅九龍城工商業聯會，近日發信廣邀會員加入廠商會做「普通會員」，仲講明入會費同首年年費由廠商會副會長吳永嘉（Jimmy）全數贊助，咁樣「包底」招兵入廠商會，難免惹來種票猜測喎。
王國強澄清係秘書搞錯
Jimmy回覆話，今次純粹係誤會，而KK就澄清係秘書搞錯，又強調Jimmy從來冇講過包底請人入會，未來幾日會再發信畀會員解釋事件喎。如果真係搞錯，呢個錯認真大喇！
早前有消息傳出，會長施榮懷嘅接班人，如果第一副會長陳淑玲唔做會長，會係副會長顏吳餘英同李秀恒之爭，估計爭位戰一定風起雲湧。就喺呢個前哨戰都未開始嘅時候，近日就流傳一封九龍城工商業聯會發畀會員嘅邀請函，除咗介紹廠商會歷史及工作外，仲提到該會創會永遠會長KK嘅好友Jimmy，想推薦各位以公司名義申請加入廠商會做「普通會員」，Jimmy就會贊助入會費同首年年費。會長換屆之年，Jimmy突然大舉招兵，莫非唔怕令人誤會？
呢件事非同小可，當然要搵相關人士求證啦，Jimmy聽到消息後都打咗個突，話自己從來冇咁講過，唔明點解封信咁寫。Jimmy好老實話，佢識咗KK好多年，不同場合都遇到，適逢今年廠商會八十周年，最近見親KK都叫佢搵人入會，但從來冇講過贊助會費招兵喎。
吳指普通會員冇得投票
Jimmy多次澄清，廠商會會長要會董先有得投票，普通會員係冇資格投票，所以唔存在幫人拉票。至於係咪有意選立法會，佢話係二○一六年嘅事，退一萬步就算真係要選，都唔使咁早啩？佢仲愈講愈勞氣向天發毒誓，話今次真係一場誤會喎。
我哋之後再問番KK，佢話的確有人包底，但包底嘅人係佢喎。KK話，知道唔少聯會會員都想加入廠商會，就不如一次過交表，仲話如果有人未交錢，佢可以代為墊支。點知佢秘書聽錯，以為係廠商會Jimmy贊助，KK話搞出個大頭佛真係唔好意思，佢仲話為免麻煩，索性墊支都唔搞，等會員自由決定係咪入會喎。