中環出更：宴請帳委會 大舊石啤啤夫
唐英年自從一二年參選特首落敗後，一直都有同班競選辦員工緊密聯絡，卓妮前晚就收到老友報料，話成班唐營競選辦員工喺中環置地廣場一間餐廳食團年飯。不過，卓妮去到現場時，就突然見到略帶醉意嘅立法會議員梁家傑離開，唔通佢真正背景係唐營中人？非也，原來前晚係立法會帳目委員會主席石禮謙（大舊石）宴請包括梁家傑在內嘅一班帳委會成員，雖然與唐唐同場，但各有各食。
連電話都唔記得攞
唐營辦團年飯好大陣仗，幾位唐營大將如立法會前秘書長馮載祥夫婦等出席，據聞連唐太郭妤淺都現身，證明唐營上下關係依然唔錯。當晚十一點幾鐘，唐唐搭餐廳專用電梯離開，所以未見佢蹤影，反而喺門外見到醉醺醺嘅大舊石等的士，佢好high咁話想同卓妮繼續飲，又話餐廳入面無晒「梁粉」，只得「唐粉」，又話自己成晚只飲威士忌，唔係好似「貪湯」前廉政專員湯顯明咁飲茅台酒喎。
大舊石講講吓，間餐廳嘅侍應突然走出來捉住佢，原來係佢飲大咗連電話都唔記得攞。電話失而復得，大舊石除咗講聲多謝外，仲嗱嗱聲攞出二百元打賞侍應，侍應當然四萬咁口嗌多謝啦！電話裏面咁多敏感資料，下次就小心啲咪咁大懵喇！
卓妮